სტამბოლი - ლეგენდარული ქალაქი, ზღაპრული ადგილი, რომელიც ევროპასა და აზიას უნიკალური ხიდებით, ოქროს რქისა და ბოსფორის მეშვეობით აკავშირებს. ეს ქალაქი კონტინენტებს არა მხოლოდ გეოგრაფიულად აკავშირებს, არამედ გახდა დიდი ცივილიზაციების ისტორიული მემკვიდრეობის გადაკვეთის ცენტრი.
ისტორია
1204 წლის აპრილში, ქალაქი პირველად ჯვაროსნებმა შტურმით აიღეს და გაძარცვეს.
1261 წელს კი კონსტანტინოპოლი კვლავ ბიზანტიის იმპერიის ხელში დაბრუნდა.
1453 წელს ქალაქი სულთან მეჰმედ II-მ დაიპყრო და ოსმალეთის იმპერიის დედაქალაქად გამოაცხადა. სტამბოლი აღარ იყო მხოლოდ ბიზანტიის ცენტრი — ის გახდა დიდებული იმპერიის „გული“ და მნიშვნელოვანი ცენტრი მთელი ისლამური სამყაროსთვის.
ქალაქისთვის განსაკუთრებულად მნიშვნელოვანი იყო სულეიმან I კანუნის (კანონმდებელი) მმართველობის პერიოდი. ის იყო იმპერიის ერთ-ერთი ყველაზე დიდი განმანათლებელი მმართველი და ბრწყინვალე სტრატეგი. მისი მმართველობისას ოსმალეთის იმპერიამ აყვავების ზენიტს მიაღწია, გააფართოვა ტერიტორია და შემოიერთა ერაყის, ლიბიის და სამხრეთ-აღმოსავლეთ ევროპის ნაწილი.
სულეიმან I-ის სახელთან არის დაკავშირებული თურქეთის სულთნების დინასტიის ერთ-ერთი ყველაზე რომანტიული ამბავი — მისი სიყვარული სლავი ქალი როქსოლანის (ჰურემ სულთანი) მიმართ. როქსოლანის ზუსტი წარმომავლობა უცნობია, მაგრამ მისი ისტორია დღემდე ცნობილია როგორც სიყვარულის და მმართველობის სიმბოლო. მისი სიკვდილის შემდეგ, სულეიმანმა ბრძანა მისი საფლავი დაემარხათ სულეიმანის მეჩეთის ტერიტორიაზე, სადაც წესით თავად სულთანის განსასვენებლი უნდა ყოფილიყო.
სულეიმანის მმართველობის პერიოდში ხდება არქიტექტორი მიმარე სინანის შემოქმედების აყვავება, რომელმაც მრავალი ნაგებობა ააშენა, მათ შორის მრავალი მეჩეთი, სასახლე და მედრესე. XVIII საუკუნემდე სტამბოლში განუწყვეტლივ იზრდებოდა მხატვრული არქიტექტურის და სასახლეების კომპლექსები, ზოგიერთ ნაგებობაზე შეინიშნება ევროპული სტილის საწყისი გავლენა.
XIX საუკუნის დასასრულსა და XX საუკუნის დასაწყისში ოსმალეთის იმპერია იწყებს დაშლას. ეროვნულ-განმათავისუფლებელი მოძრაობის გამარჯვების შემდეგ, მუსტაფა ქემალის მეთაურობით, გაუქმდა სასულთნო და ქვეყანა რესპუბლიკად გამოცხადდა, რომლის დედაქალაქი გახდა ანკარა. მიუხედავად ამისა, სტამბოლს არ დაუკარგავს თავისი მნიშვნელობა. დღეს იგი თურქეთის უმსხვილესი ინდუსტრიული და კომერციული ცენტრია და შენარჩუნებულია როგორც ქალაქი-მუზეუმი, რომელსაც ყოველწლიურად მილიონობით ტურისტი სტუმრობს.
