ისტორია
ბელეკის პირველი ხსენება ძვ. წ. IV საუკუნით თარიღდება. მმართველმა ატალ II-მ ეს ტერიტორიები რომაელებს გადასცა. სწორედ ამ დროს დაიწყო აქ გრანდიოზული ნაგებობების მშენებლობა. მოგვიანებით ეს მიწები თურქ–სელჩუკებმა დაიპყრეს, რომლებმაც პროვინციის სიმდიდრე მრავალჯერ გაზარდეს. ბელეკის თანამედროვე ისტორია 1984 წელს დაიწყო, როდესაც ჩვეულებრივ თურქულ ქალაქში ტურიზმსი განვითარება დაიწყო.
დღეს ბელეკში შეგიძლიათ დარჩეთ თურქული რივიერას მდიდრულ სასტუმროებში, ეწვიოთ სანაპიროზე მდებარე რესტორნებსა და ბარებს, შეიძინოთ ლამაზი სუვენირები და დაისვენოთ All Inclusive სასტუმროებში.
სპორტული ინფრასტრუქტურა
ბელეკი – თურქეთის ყველაზე სპორტული კურორტი
სწორედ ბელეკში მდებარეობს გოლფის ეროვნული კლუბი და მრავალი მოედანი შესანიშნავი ხარისხის საფარით.
ბელეკში ბევრი საფეხბურთო მოედანია. ზამთარში ევროპისა და აზიის საფეხბურთო გუნდები ვარჯიშობენ მათზე.
ამ ადგილებში ყვინთვა ტარდება მდინარე კეპრუჩაიზე, კეპრულუს კანიონის ფსკერზე. 12 კილომეტრიანი მარშრუტი მოიცავს 1-დან 3 –მდე სირთულის დონეს.
კეპრულუს ნაკრძალი აგრეთვე ცნობილია კლდეზე ცოცვის შესანიშნავი შესაძლებლობებით.
მარადმწვანე ევკალიპტის ტყეები შესანიშნავი ადგილია სირბილისა და ველოსიპედით სეირნობისთვის.
კლიმატი
ბელეკს აქვს სუბტროპიკული კლიმატი, რომელიც ხასიათდება მშრალი და ცხელი ზაფხულით ზომიერი ზამთრით, რომლის დროსაც ხშირია ნალექები. კურორტზე მზე ტურისტებს წელიწადში 300 დღე ახარებს, ხოლო მარადმწვანე ევკალიპტის კორომები და ფიჭვნარი ტყეები კურორტს აკრავს გარშემო, რითაც ქმნის დაბრკოლებას ცივი ჰაერის ნაკადებისთვის. ბელეკში დასვენების ყველაზე კომფორტულ დროდ ითვლება მაისიდან სექტემბრამდე პერიოდი.
ფლორა და ფაუნა
ხმელთაშუა ზღვა მდიდარია ულამაზესი ფლორითა და საოცარი ფაუნით. იდუმალი გამოქვაბულებისა და მღვიმეების გარდა, მყვინთავებს შეუძლიათ ნახონ ჩაძირული გემების ნამსხვრევები. გარდა ამისა, ბელეკი თურქეთის ერთ-ერთი იშვიათი კუთხეა, სადაც გვხვდება გიგანტური კუ – ლოგერჰედი, ანუ კარეტა–კარეტა, რომლებიც წითელ წიგნშია შეტანილი. მათი წონა შეიძლება 200 კგ-ს აღწევდეს. გარდა ამისა, კურორტს „ფრინველთა სამოთხეს“ უწოდებენ ფრინველთა უზარმაზარი რაოდენობის (109 სახეობა), მათ შორის იშვიათი სახეობების გამო. მაგალითად, აქ ბინადრობს ბუხრინწა, რომელიც კურორტის სიმბოლოა.
ბელეკისა და მიმდებარე ტერიტორიის ღირსშესანიშნაობები:
გასართობ თემატურ პარკს – The Land of Legends - "თურქულ დისნეილენდს", აქვს წყლის ატრაქციონების ფართო არჩევანი. სტუმრების განკარგულებაშია 41გორაკი, 400 მეტრიანი ჯომარდობის სიმულატორი, ტალღების აუზი, მოცეკვავე შადრევნები, ბავშვებისთვის განკუთვნილი წყლის ქვემეხები, მალდივის ქვიშიანი პლაჟის ზონები, დელფინარიუმი შოუ პროგრამებით, დელფინებთან და ბელუგასთან ერთად ცურვა, აგრეთვე წყალქვეშა საზღვაო გასეირნება.
ტროას აკვაპარკი უძველესი ქალაქის სტილშია შექმნილი - ხის კოშკები, კედლები, 25 მეტრის სიმაღლის ლეგენდარული ცხენი. მთელ ტერიტორიაზე შეგიძლიათ ნახოთ უძველესი ამფორების ასლები. აკვაპარკის მთელი პერსონალი ძველი ბერძნების მსგავსად არის ჩაცმული და შეიარაღებული.
ეროვნული ნაკრძალი "კეპრულუს კანიონი" ბელეკიდან ჩრდილოეთით 60 კილომეტრში მდებარეობს. იგი ცნობილია თავისი სამკურნალო ჰაერით, რომელიც შეიცავს ევკალიპტის, ფიჭვის, კედრის, კვიპაროსის და ღვიის ფიტონციდებს. აქ შეგიძლიათ გაისეირნოთ ზეთისხილისა და მიწისთხილის ბუჩქნარში მთის მდინარის ნაპირზე, უყუროთ ფრინველებს ან ისიამოვნოთ ჯომარდობით.
ანტიკური ქალაქი პერგე, ერთ–ერთი ვერსიით, ძვ. წ. VII საუკუნეში ან უფრო ადრეც დაარსდა. ის ცნობილია არა მხოლოდ ბერძნულ-რომაული ძეგლებით, არამედ იმითაც, რომ ბიბლიის თანახმად, აქ მოციქული პავლე ქადაგებდა. პერგე ცნობილია თავისი ამფითეატრით (II საუკუნე) ულამაზესი რელიეფებით. მისი ქანდაკებები გამოფენილია ანტალიის არქეოლოგიურ მუზეუმში. ამფითეატრის მოპირდაპირედ მდებარეობს უძველესი სტადიონი 12 ათასი ადამიანისთვის. ნაწილობრივ შემორჩენილია ციხე–სიმაგრის კედელი მე-4 საუკუნის "რომაული კარიბჭით" და ძვ .წ. III საუკუნის ელინისტური კარიბჭით. პერგეს ტერიტორიაზე აგრეთვე შეგიძლიათ ნახოთ საცხოვრებელი სახლების, ტაძრების, რომაული აბანოების მრავალი ნანგრევი.
ბელეკიდან 18 კილომეტრში მდებარეობს ასპენდოსი, რომელიც დაარსდა ძვ. წ. X საუკუნეში. ყველაზე ცნობილი ადგილობრივი ღირსშესანიშნაობაა მე-2 საუკუნის რომაული თეატრი, სადაც არქიტექტორმა ზენონმა შექმნა შესანიშნავი აკუსტიკა. დღეს თეატრში სხვადასხვა წარმოდგენები იმართება. თუ ივლის-აგვისტოში თურქეთს ეწვევით, შეგიძლიათ მოხვდეთ ოპერისა და ბალეტის ფესტივალზე. აგრეთვე ასპენდოსში კარგად არის შემონახული იპოდრომი, ნეკროპოლისი, აკროპოლისი, რომაული აკვედუკი (II საუკუნე), აგორა.
